រោងចក្រចម្រាញ់ប្រេងកាត Nghi Son និងរោងចក្រឥន្ធនៈគីមី នៅក្នុងខេត្ត Thanh Hoa ប្រទេសវៀតណាម ត្រូវបានចាប់ផ្តើមប្រតិបត្តិការអាជីវកម្មហើយ កាលពីថ្ងៃទី២៣ ខែធ្នូ ឆ្នាំ២០១៨។
លោក ង្វៀន សួនហ៊្វុក នាយករដ្ឋមន្រ្តីវៀតណាម បានថ្លែងក្នុងពិធីបើកដំណើការនេះថា ប្រតិបត្តិការពាណិជ្ជកម្មនេះ គឺមានសារៈសំខាន់ចំពោះនយោបាយ សេដ្ឋកិច្ច សង្គម សន្តិសុខ ការពារជាតិ និងចូលរួមចំណែកក្នុងការធានាដល់សន្តិសុខថាមពលជាតិ។
លោកបន្តថា តាមរយៈរោងចក្រនេះ និងរោងចក្រចម្រាញ់ប្រេងកាត Dung Quat ដែលស្ថិតក្នុងខេត្ត Quang Ngai នោះនឹងអាចបំពេញបានជាង ៨០% នៃតម្រូវការក្នុងស្រុក ពោលគឺអាចកាត់បន្ថយការពឹងផ្អែកការនាំចូលប្រេងពីបរទេស។
នាយករដ្ឋមន្ត្រីរូបនេះ លើកឡើងបន្ថែមថា គម្រោងនេះគឺជានិមិត្តរូបមួយនៃកិច្ចសហប្រតិបត្តិការអន្តរជាតិ ដែលទទួលបានការយកចិត្តទុកដាក់ជាពិសេសពីរដ្ឋាភិបាលវៀតណាម និងដៃគូសំខាន់ៗដូចជា គូវែត និងជប៉ុន ជាដើម។ មិនតែប៉ុណ្ណោះ វាក៏បានបង្កើតនូវកម្លាំងពលកម្មជំនាញ ដែលបម្រើធ្វើជាស្នូលដ៏សំខាន់សម្រាប់ការអភិវឌ្ឍធនធានមនុស្សនៅក្នុងតំបន់ផងដែរ។
សូមបញ្ជាក់ថា ការសាងសង់រោងចក្រខាងលើនេះ ត្រូវបានចាប់ផ្តើមធ្វើឡើងនៅក្នុងឆ្នាំ២០១៣ ដែលចំណាយដើមទុនសរុបជាង ៩ពាន់លានដុល្លារ។ គម្រោងនេះ ជាការរួមគ្នារវាងក្រុមហ៊ុនវៀតណាម PetroVietnam (២៥,១%), ក្រុមហ៊ុនគូវែត Kuwait Petroleum International (៣៥,១%) និងក្រុមហ៊ុនជប៉ុន Mitsui Chemicals (៤,៧%)។ ក្នុងដំណាក់កាលទី១ រោងចក្រនេះមានសមត្ថភាពអាចផលិតប្រេងឆៅបាន ២០ម៉ឺនបារែលក្នុងមួយថ្ងៃ៕
អត្ថបទដកស្រង់៖ ខ្លីខ្លី
Comments
Post a Comment