ក្បួន​រកស៊ី​ជោគ ជ័យ​របស់ ស៊ិន វ៉ាន់សាន​​​ (Shen Wansan)

(ចិន)៖ មហាសេដ្ឋីមានបំផុតនាសម័យដើមរបស់ចិន លោក ស៊ិន វ៉ាន់សាន ជម្នៈនឹងឧបសគ្គប្រឆាំងនឹងវាសនា ផ្លាស់ប្តូរជីវិតពីកូនកសិករ ក្លាយជាមហាសេដ្ឋីមានបំផុតដែលប្រជាជនចិនគោរពដូចព្រះ។​

មហាសេដ្ឋី ស៊ិន វ៉ាន់សាន កើតនៅឆ្នាំ១៣៣០ នាចុងសម័យកាលយាន ក្នុងគ្រួសារកសិករក្រីក្រ ធ្វើស្រែចំការគ្រប់ជំនាន់ ប៉ុន្តែលោកបែរជាហ៊ានតតាំងជម្នៈចិត្តឪពុកឆក់ចូលក្នុងវិស័យជំនួញទាំងក្មេងខ្ចី រៀនរកស៊ីដោយខ្លួនឯង។​

មុខជំនួញដែលលោកចាប់ផ្តើមប្រឡូកដំបូងដៃនាពេលនោះ ទាក់ទងច្រើនបំផុតនឹងវិស័យកសិកម្ម លោកចូលប្រមូលទិញដីស្រែ ផលិត នាំចេញ លក់ទិញឥតល្ហែង និងបន្តកិច្ចសហការរកស៊ីជាមួយបរទេសនាំចេញសូត្រ ផលិតផលសិប្បកម្ម ដោយប្រមូលចូលវិញនូវគ្រឿងអលង្ការមានតម្លៃ និងលក់ចែកចាយទូទាំងប្រទេស រួមទាំងមុខរបរសំខាន់ៗផ្សេងទៀត។

នៅលើវិថីរកស៊ី ស៊ិន វ៉ាន់សានក៏ផ្តើមបណ្តុះគំនិតរកស៊ី និងរៀនសូត្រតាមមហាសេដ្ឋីផ្សេងៗដែលក្នុងនោះមានសេដ្ឋីប្រចាំស្រុកម្នាក់ដែលបានជួយជ្រំជ្រែងលោកខ្លាំងបំផុតឈ្មោះថា Lu Deyuan។

ចំណាយពេលរៀនសូត្រ ជីវិតជោគជ័យឡើងដល់កំពូល និងធ្លាក់ចុះដល់ចំណុចសូន្យជាច្រើនលើក តែមិនបោះបង់ ធ្វើឲ្យមហាសេដ្ឋីរូបនេះអាចបង្កើតក្បួនកសាងភាពមានបានឲ្យខ្លួនឯង មានលុយហូរចូលរាប់មិនអស់ ហើយអ្នកជំនាន់ក្រោយដែលរៀនសូត្រតាមគាត់ក៏ជោគជ័យបន្តគ្នាមិនតិចអ្នកនោះដែរ។

កំពូលអ្នកមានរូបនេះ ត្រូវបានប្រជាជនចិនកោតសរសើរ គោរព និងឲ្យតម្លៃខ្លាំងបំផុត ព្រោះតែភាពវ័យឆ្លាតក្នុងការរកស៊ីបង្កើតភាពមានបានដ៏មហិមាឲ្យខ្លួនឯង និងក្លាយជាមហាសេដ្ឋីចិត្តធម៌ម្នាក់ដែលប្រជាជនចិន គោរពដូចព្រះ ព្រោះតែចិត្តមេត្តា និងភាពស្មោះត្រង់របស់លោក ហើយលោកក៏ជាបុគ្គលដែលហ៊ានតតាំងនិងនយោបាយជាតិខ្លាំងបំផុតផងដែរទាំងក្នុងសម័យកាលយាន និងសម័យកាលម៉េង។

ស៊ិន វ៉ាន់សាន មានប្រសាសន៍ថា៖ “ចិត្តធម៌ ចិត្តមេត្តា និងភាពស្មោះត្រង់ ជាឫសគល់នៃសហគ្រិន ជោគ ជ័យ​”​។

 ប្រភព​​៖ Business Cambodia
https://www.youtube.com/playlist?list=PL3716ZKNM7xrdL0udLkkqbhKREKg8k0m4​