ទូភីគឺជាក្របីដ៏ខ្លាំងពូកែមួយដែលមានឪពុកឈ្មោះ មហឹង្សារាជ(ជាកូនព្រះឥសូរ) មហឹង្សារាជនេះ អោយតែកូនកើតមកឈ្មោលគឺសម្លាប់ចោល លុះម្តាយទូភីនេះផើមក៏រត់ចេញពីហ្វូង ទៅរកស៊ីតែឯងរហូតទាល់តែកើតបានកូនទូភីនេះមក ។ ពេលទូភីធំសួរម្តាយរកឪពុក ម្តាយថាបាឯងខ្លាំងពូកែណាស់ ចង់ជួបត្រូវតែហាត់វធ័ផ្លែកន្ទួតព្រៃ និងក្រសាំង៧ដើម វធ័កុំអោយផ្លែនោះជ្រុះដល់ដីសិន និងទៅរៀនស៊ីស្មៅ៧វាល ផឹកទឹក៧បឹងសិនចាំទៅជួប ។ លុះហាត់បានសម្រេចហើយ ថ្ងៃមួយក្របីមហឹង្សារាជ ឃើញទូភី ក៏បោះពួយមកសម្លាប់ទូភី ឯទូភីមិនស្គាល់មហឹង្សារាជជាឪពុកក៏វធ័ស្លាប់ទៅ ។ ដោយមានអំនួតពីថ្វីដៃខ្លាំងពូកែរបស់ខ្លួនក្របីទូភី ក៏បន្តទៅរាតត្បាតដល់នគរខះខិន ដែលមានស្តេចស្វាពាលីសោយរាជ្យ ។ ស្តេចស្វាពាលីច្បាំងជាមួយក្របីទូភី អស់ប៉ុន្មានយប់ប៉ុន្មានថ្ងៃមិនចាញ់ឈ្នះ ក៏បបួលទូភីទៅច្បាំងគ្នាក្នុងរូងភ្នំ កុំអោយរំខានដល់ប្រជារាស្រ្ត ។ លុះទៅច្បាំងក្នុងរូងភ្នំក៏នៅតែមិនចាញ់ឈ្នះ កក្រើកផ្អើលអស់ទេវតា អ្នកតាព្រៃភ្នំ ស្តេចស្វាពាលីចេះតែដេញសួរក្របីទូភីថា ៖ឯងខ្លាំងយ៉ាងនេះដោយសារអ្វី ? ដំបូងក្របីទូភីឆ្លើយត្រង់ថាដោយសារទេវតា១០អង្គនៅលើស្នែងអញ លុះច្បាំងតទៅទៀតរកចាញ់ឈ្នះមិនឃើញ ស្តេចស្វាពាលីចេះតែដេញសួរពាក្យដដែលៗ ក្របីទូភីក៏តាំងមានអំនួតហើយក៏ឆ្លើយថា ៖ អញខ្លាំងព្រោះតែអញស៊ីស្មៅ៧វាល ផឹកទឹក៧បឹង ។ ទេវតាដែលនៅការពារទូភីទាំង១០អង្គ ខឹងក៏រត់ទៅជួយស្តេចស្វាពាលីវិញ ក្របីទូភីក៏ថមថយកម្លាំង ស្តេចស្វាពាលីក៏ចាប់ក្បាលក្របីទូភីកាត់កយកតែម្តងទៅ ។
មុនពេលចូលទៅច្បាំងគ្នាក្នុងរូងភ្នំស្តេចស្វាពាលី បានផ្តាំទៅប្អូនរបស់ខ្លួនឈ្មោះសុគ្រីពថា ចូរប្អូនចាំមើលបើឃើញឈាមខ្មៅហូរចេញតាមល្អាងមកក្រៅនោះជាឈាមក្របីទួភីហើយ តែបើឈាមនោះពណ៌ក្រហមគឺជាឈាមបង ដូច្នេះឯងត្រូវយកថ្មសន្ធប់រូងភ្នំនោះកុំអោយទួភីចេញរួច ។ លុះស្តេចស្វាពាលីកាត់ក្បាលក្របីទួភី ឈាមក្របីពណ៌ខ្មៅមែនតែទេវតាទាំង១០ដែលទៅជួយពាលីនោះក៏បាចផ្កាសាទរដល់ជ័យជំនះសុគ្រីព ធ្វើអោយឈាមក្របីទួភីឡើងពណ៌ក្រហមវិញ ហូរចេញមក ឯសុគ្រីពនៅចាំមាត់ល្អាងឃើញដូច្នេះក៏សន្ធប់រូងភ្នំនោះតែម្តង ព្រោះគិតថាបងរបស់ខ្លួនស្លាប់បាត់ហើយ ។ រីឯស្វាពាលីចេញមកវិញមិនរួចក៏ខឹងទាញបានក្បាលក្របីទួភីគប់បំបែកផ្ទាំងថ្មភ្នំនោះបែកអស់ទៅ លុះមកដល់នគរបែជាឃើញប្អូនឡើងសោយរាជ្យជំនួសខ្លួនទៅវិញ កាន់តែខឹងគិតស្មានថាប្អូនក្បត់ខ្លួន ទាញយកស្បែកជើងវាយក្បាលសុគ្រីពកណ្តាលអង្គជំនំ សុគ្រីពខឹងនិងបងក៏រត់ទៅយំនៅឯព្រៃ ឡើងអាចម៏ភ្នែកគរជាដំបូក រហូតព្រះរាម ដើរទៅជួបក៏ហៅមកជាមួយ ។
«សូមស្វែរកអានរឿងរាមកេរ្តិ៍បន្ត»
(រូបនេះជាស្តូបមួយនៅខាងត្បូងវិមានឯរាជ្យ ដែលកសាងក្នុងសម័យសង្គមរាស្រ្តនិយម ហើយត្រូវគេយកចេញក្នុងចុងទសវត្ស៨០ )
ប្រភព៖ ដកស្រង់ពីហ្វេសហ៊ុក Tara Om
Comments
Post a Comment