មេរៀន​៥​ចំណុច​ពី​អតីត​ប្រធានាធិបតី​អាមេរិច​លោក John F. Kennedy

អ្នកប្រហែលធ្លាប់បានស្គាល់ លោក John F. Kennedy អតីតប្រធានាធិបតី ដ៏ល្បីល្បាញបំផុតរបស់អាមេរិចហើយ។ លោកជាមនុស្សដែលទទួលបានការគោរពស្រទ្បាញ់ច្រើនពីប្រជាជន ក្នុងនាមជាមេដឹកនាំប្រទេសម្នាក់។ ខាងក្រោមនេះជាអ្វីដែលអ្នកអាចរៀនសូត្រពីលោកKennedy សម្រាប់យកមកប្រើអាជីវកម្មនិងជីវិតរបស់លោកអ្នកបាន៖ 

១.  ត្រូវហ៊ានតាំងចិត្តដើម្បីប្រថុយនឹងហានិភ័យ 

លោកប្រធានាធិបតីរូបនេះបានពោលថា មនុស្សដែលហ៊ានប្រថុយខាតបង់ខ្លាំង អ្នកនោះក៏នឹងជោគជ័យធំដែរ។ ក្នុងមួយជីវិតរបស់លោកប្រធានាធិបតី លោកបានប្រថុយច្រើនដង ណាស់ ហើយការប្រថុយលើកចុងក្រោយ គឺសឹងតែកើតសង្រ្គាមលោកលើកទី៣ទៅហើយ។ តែយ៉ាងណា ជោគជ័យចេញពីការប្រថុយរបស់លោក គឺមានន័យណាស់សម្រាប់ប្រទេសរបស់លោក។ 

២. ត្រូវចេះប្រើអ្វីដែលខ្លួនមាន 

លោក Kennedy កើតក្នុងត្រកូលអ្នកមាន តែគាត់បានរៀនមេរៀន នៃការចេះប្រើអ្វីដែលខ្លួនមាន តាំងពីឪពុកលោកនៅក្រមកម្លេះ។ ដោយសារតែលោកចេះប្រើនេះហើយ ទើបគាត់បានក្លាយជា មនុស្សពូកែស្ទើរគ្រប់កាលៈទេសៈ។ ជាឧទាហរណ៍ ពេលដែលលោកឈឺឆ្អឹងខ្នង ដើរមិនសូវបាន គាត់បានសម្រាក តែពេលសម្រាកនោះ គាត់បានអានសៀវភៅ និងរៀនសូត្របានយ៉ាងច្រើន។ ដូចនេះគាត់ចេះប្រើពេលដែលគាត់ឈឺ ដើម្បីជាឱកាសក្នុងការរៀនសូត្រ។ 

៣. ធ្វើឲ្យវិបតិ្តក្លាយជាឱកាស 

លោកប្រធានាធិបតី John Kennedy បានពន្យល់ត្រង់ចំណុចនេះថា នៅក្នុងភាសាចិន ពាក្យថាវិបតិ្ត ត្រូវបានសសេរដោយចេញពីពាក្យពីរម៉ាត់។ ទីមួយគឺគ្រោះថ្នាក់ និងទី២គឺឱកាស។ ដូចនេះនៅគ្រប់គ្រាដែលមានវិបតិ្តក៏មានដែរនូវឱកាស ដើម្បីជោគជ័យ។ នៅពេលគាត់ចេញប្រកួតដើម្បីឈ្នះការបោះឆ្នោត គាត់នៅក្មេង ហើយគាត់ជាអ្នកកាន់សាសនា កាតូលិក ដែលនេះជាឧបសគ្គដើម្បីឲ្យគាត់ជោគជ័យ។ តែយ៉ាងណាគាត់បានយកចំណុចខ្សោយរបស់គាត់នេះដើម្បីឈ្នះការបោះឆ្នោតបាន។ 

៤. ឈប់រអ៊ូរ ហើយចាប់ផ្តើមលើកទឹកចិត្តមនុស្សជុំវិញ 

គាត់បានលើកទ្បើងថា មនុស្សភាគច្រើនចូលចិត្តរអ៊ូរណាស់ នេះហើយជាមូលហេតុដែលមនុស្សធម្មតាខ្វះជោគជ័យ។ គួរបញ្ជាក់ថា ក្នុងជីវិតផ្ទាល់ខ្លួនរបស់លោក មានជម្ងឺឆ្អឹងខ្នង តែលោកមិនដែលរអ៊ូរទេ។ ក្នុងជីវិតជាប្រធានាធិបតីវិញ គាត់តែងផ្តល់ក្តីសង្ឃឹម ដល់ប្រជាជន អាមេរិច ខណៈដែលប្រជាជនកំពុងតែអស់សង្ឃឹម កំពុងតែភ័យខ្លាចសង្រ្គាមត្រជាក់រីករាលដាល។ 

៥. បន្តដំណើរទៅមុខ ទោះឧបសគ្គធំប៉ុនណាក៏ដោយ 

កុំបួងសួងសុំជីវិតងាយស្រួល ចូរបួងសួងសុំជីវិតធ្វើជាមនុស្សដែលរឹងមាំវិញ។ ក្នុងជីវិតផ្ទាល់ខ្លួន និងជីវិតជាប្រធានាធិបតី លោក Kennedy បានជួបនឹងឧបសគ្គរាប់មិនអស់ បរាជ័យក៏ច្រើនដែរ តែអ្វីដែលគាត់មានជាប់ខ្លួនជានិច្ចនោះគឺ ភាពអត់ធ្មត់។ គាត់ជាមនុស្សដែល អាចខាំធ្មេញ សង្កត់ ចិត្ត និងបន្តដំណើរឆ្លងឧបសគ្គទៅមុខជានិច្ច៕ 

 ប្រភព៖ thoughtcatalog.com