រដ្ឋបាលរាជធានីភ្នំពេញ នៅថ្ងៃទី២៦ ខែវិច្ឆិកា ឆ្នាំ២០១៨នេះ បានចេញសេចក្ដីជូនដំណឹង ពីការហាមឃាត់ការប្រើប្រាស់ម៉ាស៊ីនថតរូប និងវីដេអូបំពាក់លើដ្រូន ក្នុងរាជធានីភ្នំពេញ ជាពិសេសផ្លូវហោះហើររបស់យន្តហោះ។ ការចេញសេចក្ដីជូនដំណឹងនេះ គឺដោយសារការព្រួយបារម្ភ បន្ទាប់ពីរដ្ឋបាលរាជធានីរកឃើញ បុគ្គលមួយចំនួនតូច បានបង្ហោះម៉ាស៊ីនថតរូប និងវីដេអូបំពាក់លើដ្រូន ដើម្បីជាល្បែងកម្សាន្ត ពុំមានការអនុញ្ញាតត្រឹមត្រូវ ពុំដឹងផលប៉ះពាល់លើផ្នែកសន្តិសុខនិងសុវត្ថិភាព ជាពិសេស បង្ហោះនៅក្នុងតំបន់ហាមឃាត់ជុំវិញព្រលានយន្តហោះអន្តរជាតិភ្នំពេញ និងចំផ្លូវហោះហើររបស់យន្តហោះ ដែលអាចបង្កគ្រោះថ្នាក់ជាយថាហេតុ។
រដ្ឋបាលរាជធានី ស្នើឲ្យប្រជាពលរដ្ឋរស់នៅជុំវិញព្រលានយន្តហោះចូលរួមអនុវត្តសេចក្ដីជូនដំណឹងនេះ។ ហើយក្នុងករណីចាំបាច់ត្រូវការប្រើប្រាស់ ប្រជាពលរដ្ឋត្រូវសុំការអនុញ្ញាតពី រដ្ឋបាលរាជធានីភ្នំពេញ និងរដ្ឋលេខាធិការដ្ឋានអាកាសចរណ៍ស៊ីវិល។ រដ្ឋបាលរាជធានីបន្តថា ស្នងការដ្ឋាននគរបាលរាជធានីភ្នំពេញ បញ្ជាការដ្ឋានកងរាជអាវុធហត្ថរាជធានីភ្នំពេញ និងគណៈបញ្ជាការឯកភាពរដ្ឋបាលខណ្ឌទាំង១២ នឹងចាត់វិធានការចំពោះការបង្ហោះម៉ាស៊ីនថតរូប និងវីដេអូបំពាក់លើដ្រូន ក្នុងរាជធានីភ្នំពេញ ពិសេសតំបន់ជុំវិញផ្លូវហោះហើររបស់យន្តហោះដោយគ្មានច្បាប់អនុញ្ញាត៕
Comments
Post a Comment