ប៊ុ្រយណេ៖ ប្តីប្រពន្ធជនជាតិប៊្រុយណេ រៀបការហើយសល់លុយតែជាង២០០ដុល្លារប៉ុណ្ណោះ ចាប់ដៃគ្នារៀនរកស៊ីនាំចូលកន្សែងពីម៉ាឡេស៊ីមកលក់ទាំងត្រដាបត្រដួសរហូតក្លាយជាឈ្មួញផលិត និងលក់កន្សែង សម្លៀកបំពាក់ដ៏ធំនៅក្នុងស្រុកដែលអាចរកចំណូលកន្លះឆ្នាំជាង២០ម៉ឺនដុល្លារអាមេរិក។
លោក Hj Mohd Sabri Hj Suhaili រៀបការជាប្តីប្រពន្ធជាមួយ Syedah Siti Sarah Hj Syed កាលពីឆ្នា២០១០ នៅអំឡុងពេលដែលលោក Suhaili នៅបម្រើការងារជាកម្មករគេ រកចំណូលប្រចាំខែយ៉ាងលំបាក។
ក្រោយរៀបការ អ្នកទាំងពីរបានក្តាប់លុយដែលមានជាង២០០ដុល្លារ សាកល្បងនាំចូលកន្សែងរុំក្បាល ដែលស្ត្រីម៉ូស្លីមនិយមពាក់ ពីប្រទេសម៉ាឡេស៊ីចំនួន៤០ឈុត លក់ចេញយ៉ាងលំបាក ព្រោះតែផលិតផលថ្មី ការរចនាម៉ូតថ្មី ពុំទាន់មានគេឯងស្គាល់ ស្របពេលដែលពួកគេទាំងពីរនាក់នៅតែបន្តធ្វើការងារជាកម្មករគេនៅឡើយ។
អតិថិជនជាវផលិតផលកន្សែងរុំក្បាលរបស់ពួកគេគឺជាអ្នកជិតខាង មិត្ត អ្នកស្គាល់គ្នា ក្រោយមកក៏បន្តចាប់ផ្តើមមានគេណែនាំតៗគ្នា ធ្វើឲ្យប្តីប្រពន្ធពីរនាក់នេះអាចលក់ដាច់ពីស្តុកគ្រប់ពេលដែលកម៉្មង់ឥវ៉ាន់មកដល់រៀងរាល់២សប្តាហ៍ម្តង បង្កើតផលចំណេញពីលុយដ៏តិចនេះទ្វេដង។
ការងារលក់ដូរក្រៅម៉ោងដែលជំនួញផ្ទាល់ខ្លួននេះ កាន់តែមានភាពខ្លាំងក្លាឡើងនៅក្រោយពេលដែលពួកគេចាប់ផ្តើមធ្វើការផ្សព្វផ្សាយតាមអនឡាញ បើកលក់ជាផ្លូវការនៅហ្វេសប៊ុក។
លោក Suhaili បញ្ជាក់ថា នៅអំឡុងពេលនោះរូបលោក និងភរិយាគិតថា ការលក់អនឡាញអាចមានសក្តានុពលខ្លាំង ព្រោះប្រជាជនប៊ុ្រយណេជាង៣០ម៉ឺននាក់កំពុងប្រើប្រាស់បណ្តាញសង្គមហ្វេសប៊ុក ហើយជឿជាក់ថាក្នុងចំណោម៣០ម៉ឺននាក់នោះ ពាក់កណ្តាលគឺជាមនុស្សស្រី ដែលនឹងប្រើប្រាស់កន្សែងរុំក្បាលនេះឯង នោះហើយគឺជាអតិថិជនគោលដៅ និងជាវិធីធ្វើទីផ្សារដ៏ល្អបំផុត។
នៅឆ្នាំ២០១៦ ប្តីប្រពន្ធពីរនាក់នេះសម្រុកផ្តោតតែលើមុខជំនួញមួយនេះប៉ុណ្ណោះ ដោយសម្រេចចិត្តបោះបង់ការងារចោល ព្រោះតែពួកគេយល់ថា ការខិតខំធ្វើការងារអាចឲ្យពួកគេរកចំណូលប្រចាំទៀតទាត់តែមិនកើនឡើង និងគ្រប់តម្រូវការចាយវាយនោះទេ។ ផ្ទុយពីការរកស៊ី នៅពេលដែលលក់ផលិតផលអស់ បើអ្នកដាក់លុយ២០០ដុល្លារ អ្នកនឹងអាចទទួលបានផលចំណេញស្ទើរតែប្រហាក់ប្រហែលនឹងលុយដែលបានចំណាយនោះ ហើយបើអ្នកសម្រុករកស៊ីកាន់តែខ្លាំងអ្នកក៏កាន់តែកើនឡើងប្រាក់ចំណូលដូចគ្នាដែរ។
កាលពីឆ្នាំ២០១៥ ពួកគេបានចាប់ផ្តើមផលិត និងកែច្នៃកន្សែងរុំក្បាលដោយខ្លួនឯង និងមានទីតាំង ក៏ដូចជាឈ្មោះ (Brand) ផលិតផលដោយខ្លួនឯងផងដែរ ហើយនៅឆ្នាំ២០១៦តែកន្លះឆ្នាំប៉ុណ្ណោះ ពួកគាត់អាចរកចំណូលបានជាង២០ម៉ឺនដុល្លារអាមេរិក ដែលជាចំនួននៃការលក់ដ៏ខ្ពស់បំផុតមិនធ្លាប់មាន តាំងពីពួកគាត់ចាប់ផ្តើមរកស៊ីមុខរបរនេះ។
ពួកគាត់ទាំងពីរ មានក្តីស្រមៃក្នុងពេលដ៏ខ្លីខាងមុខ បង្កើតជារោងចក្រផលិត និងកែច្នៃសម្លៀកបំពាក់ កន្សែងរុំក្បាលទាំងនេះដោយខ្លួនឯងនៅក្នុងស្រុក ហើយសង្ឃឹមថាអាចនាំចេញក្រៅប្រទេសវិញម្តង៕
អត្ថបទដកស្រង់ពី ពាណិជ្ជកម្មកម្ពុជា
Comments
Post a Comment